Rreth Nesh

Gjatë fushatave zgjedhore, qytetarët përballen me një sasi të madhe informacioni politik, por shpesh është e vështirë të kuptosh, krahasosh dhe vlerësosh në mënyrë të qartë se çfarë propozojnë subjektet politike. Sidomos për zgjedhësit që votojnë për herë të parë, mungesa e informacionit të strukturuar dhe të krahasueshëm mund ta bëjë procesin edhe më të vështirë.

Votometri synon ta ndryshojë këtë. Ne duam ta bëjmë informacionin politik më të qartë, më të krahasueshëm dhe më të aksesueshëm, në mënyrë që qytetarët të mund të formojnë bindjet e tyre mbi bazën e informacionit, jo vetëm të mesazheve të fushatës.

Votometri është një nismë qytetare e pavarur dhe jopartiake. Në këtë fazë, Votometri operon si projekt pilot dhe është në proces regjistrimi si organizatë jofitimprurëse (OJF) / qendër edukimi qytetar në Republikën e Shqipërisë. Deri në përfundimin e këtij procesi, Votometri administrohet drejtpërdrejt nga grupi themelues.

Votometri është ende në fazën e tij të parë. Edicioni pilot po përdoret për të testuar dhe përmirësuar metodologjinë, pyetësorin dhe përvojën e përdoruesit. Me zhvillimin e projektit, synojmë të zgjerojmë bashkëpunimin me subjektet politike, studiuesit, organizatat e shoqërisë civile dhe përdoruesit.